Nokkrir grunaðir um auðgunarbrot

Nokkrir einstaklingar hafa fengið stöðu grunaðra í tengslum við rannsókn embættis sérstaks saksóknara á kaupum Q Iceland Finance, eignarhaldsfélags sjeiks Mohamed Bin Khalifa Al-Thani frá Katar, á um fimm prósenta hlut í Kaupþingi í september síðastliðnum.

„Annars vegar erum við að skoða hvort þessi viðskipti kunni að varða ákvæði um markaðsmisnotkun í lögum um verðbréfaviðskipti og hins vegar auðgunarbrotakafla almennra hegningarlaga,“ segir Ólafur Þór Hauksson, sérstakur saksóknari. Að sögn Ólafs leikur grunur á að umrædd viðskipti hafi verið til þess fallin að veita rangar og villandi upplýsingar til markaðarins um stöðu Kaupþings, en undir ákvæði um markaðsmisnotkun falla m.a. sýndarviðskipti.

Ekki er búið að yfirheyra Ólaf Ólafsson, sem er persónulegur vinur sjeiksins og var annar stærsti eigandi Kaupþings, en hann hafði milligöngu um viðskiptin.

Talið er líklegt að fleiri fái stöðu grunaðra en mönnum er formlega gefin sú staða við yfirheyrslur. Hin meintu brot geta varðað allt að sex ára fangelsi.

Leitað á heimili og skrifstofu Ólafs

Í tengslum við rannsókn embættis sérstaks saksóknara fóru fram húsleitir á tólf stöðum í gær og síðastliðinn þriðjudag, að undangengnum dómsúrskurðum. Með húsleitunum geta rannsakendur lagt hald á gögn og muni sem kunna að skipta máli fyrir rannsókn málsins, t.d. tölvupósta. Samkvæmt 3. mgr. 74. gr. laga um meðferð sakamála er skilyrði fyrir húsleit að rökstuddur grunur leiki á að framið hafi verið brot sem sætt geti ákæru og að sakborningur hafi verið þar að verki, enda séu augljósir rannsóknarhagsmunir í húfi. M.a. var leitað í höfuðstöðvum Kaupþings og á heimilum fyrrverandi stjórnenda bankans.

Í gær var gerð húsleit á heimili Ólafs Ólafssonar og á skrifstofu Q Iceland Finance ehf., sem er til húsa hjá lögmannsstofunni Fulltingi á Suðurlandsbraut. Jafnframt var leitað á skrifstofum Arion verðbréfavörslu og á skrifstofum Kjalars, sem er eignarhaldsfélag í eigu Ólafs. Svo virðist sem rannsakendur hafi talið að Ólafur væri með skrifstofu í höfuðstöðvum Samskipa því þeir sem þangað voru sendir í gær gripu í tómt.