Matspróf á vanlíðan krabbameinssjúkra

Unnið er að því að koma á matskerfi á vanlíðan krabbameinssjúklinga hjá lyflækningasviði Landsspítalans. Vilhelmína Haraldsdóttir, framkvæmdastjóri sviðsins, segir sjúklinga oft bera sig vel þrátt fyrir að líða í raun afar illa.

Matskerfið, sem er að bandarískri fyrirmynd, er nokkurs konar krossapróf með einföldum spurningum. Spurningarnar taka á verkjum, svefntruflunum, depurð og andlegri vanlíðan o.fl. Þá meta sjúklingar vanlíðan sína á skala eða mæli. Þetta kemst fyrir á einu blaði og er fljótlegt að fylla út. Meiningin er að biðja sjúklinga að fylla matið út reglulega. „Við vonum að þetta hjálpi okkur að meta líðan hvers sjúklings fyrir sig en einnig til að meta almennt hvað valdi vanlíðan á hverju stigi meðferðar og sjúkdóms.“

Ekki fast ferli

Haukur Lárus Hauksson, sem greindist með krabbamein fyrir þremur árum, gagnrýndi í viðtali við Morgunblaðið nýverið skort á andlegri aðstoð við sjúklinga þegar þeim eru færðar fregnir af greiningu alvarlegra sjúkdóma á borð við krabbamein. Hann vill að komið sé á föstu ferli þannig að þegar læknir viti að hann sé að fara að færa fólki slæmar fregnir þá sé búið að kalla til sálfræðing sem hjálpi sjúklingi yfir fyrsta áfallið.