Úrskurðaður í gæsluvarðhald

Karlmaður um þrítugt hefur verið úrskurðaður í gæsluvarðhald til 1. september að kröfu lögreglunnar á höfuðborgarsvæðinu og er það gert á grundvelli rannsóknarhagsmuna.

Maðurinn var handtekinn á Dalshrauni í Hafnarfirði í gærkvöld en í húsi við götuna fann lögreglan karlmann á svipuðum aldri sem var látinn þegar að var komið. Hinn látni var með áverka á höfði sem taldir eru hafa dregið hann til dauða.

Maðurinn sem er í haldi er grunaður um verknaðinn en hann hefur áður komið við sögu hjá lögreglu, m.a. vegna ofbeldis- og fíkniefnabrota. Hann var blóðugur og í annarlegu ástandi þegar lögreglan kom á vettvang í Hafnarfirði í gærkvöld. Maðurinn var yfirheyrður í dag en ekki er hægt að greina frekar frá rannsókn málsins að svo stöddu.

• 2 blogg um fréttina

Bloggað um fréttina

• Guðný Lára: Verð aðeins að tæma hugann...
• Jenný Anna Baldursdóttir: Stöð 2 hin íslenska gula pressa?