Orkudrykkirnir nú bannaðir unglingum

„Við höfum áhyggjur af neyslu orkudrykkjanna enda geta áhrifin verið mjög skaðleg sé þeirra neytt í óhófi. Við höfum því ákveðið að banna alla notkun þeirra í félagsmiðstöðvum og á viðburðum á okkar vegum,“ segir Arna Margrét Erlingsdóttir, verkefnisstjóri tómstundamála hjá Kópavogsbæ.

Á fyrsta sameiginlega viðburði félagsmiðstöðvanna þar í bæ nú í haust sást í umferð ný tegund orkudrykkja. Um er að ræða svonefnd Burn orkuskot sem fást í litlum glösum, en í þeim eru 5,5 g af sykri og 80 mg af koffíni.

Neysla má ekki fara yfir leyfilegan dagskammt en í einu tilviki varð starfsfólk félagsmiðstöðvanna í Kópavogi vart við að neyslan var orðin þrefalt meiri en ráðlegt hámark segir til um.

Önnur tegund af orkuskotum, RedFin Engergy, hefur verið í umferð og þykir ekki síður hættuleg.

Frá félagsmiðstöðvunum Kringlumýri og Kampi í Reykjavík hafa verið send út varnaðarorð vegna þess hve mikið koffíninnihaldið er þar sem einnig er vakin athygli á að dreifendur vörunnar hafi límt miða yfir innihaldslýsingu.