Jens P. Guðjónsson gullsmiður látinn
Jens P. Guðjónsson gullsmíðameistari lést á Hrafnistu í Reykjavík 9. mars sl., 89 ára að aldri.
Jens fæddist á Ísafirði 21. júlí 1920. Foreldrar hans voru Hansína Magnúsdóttir og Guðjón Jónsson. Hann ólst upp á Ísafirði ásamt þremur systkinum sínum, þeim Ólafíu, Magnúsi og Skúla.
Jens fór ungur til Reykjavíkur og vann meðal annars við uppbyggingu flugvallarins í Vatnsmýrinni í Reykjavík.
Jens var alla tíð mikill listunnandi og ungur lagði hann út á listabrautina og lærði gullsmíði hjá móðurbróður sínum Guðlaugi Magnússyni. Þá stundaði hann framhaldsnám í Danmörku um tveggja ára skeið.
Jens rak eigið gullsmíðaverkstæði og verslun í Reykjavík, lengi vel í Kringlunni. Hann var eftirsóttur gullsmiður og brautryðjandi í smíði skartgripa þar sem margar nýjungar í formgerð litu dagsins ljós.
Áhugamál hans önnur en vinnan voru listmálun og teiknun að ógleymdu golfinu.
Ungur að árum gekk Jens í Guðspekifélagið og lagði þar fram krafta sína. Jens lagði mikið upp úr hugleiðslu og hélt andlegri reisn og vinnuþreki langt fram á efri ár. Áttatíu og fjögurra ára var hann enn að störfum en síðustu árin sín átti hann gott athvarf á Hrafnistu í Reykjavík.
Á gamlársdag 1953 kvæntist Jens Ingibjörgu Ólafsdóttur og eignuðust þau dótturina Hansínu árið 1954. Ingibjörg átti börn fyrir. Hansína lærði gullsmíði og starfaði lengi við hlið föður síns.