Hraun frá gíg Eyjafjallajökuls virðist smám saman vera að éta sig í gegn um ísinn í Gígjökli. Talið er að þetta sé síðasta íshaftið í jöklinum og að eftir það eigi hraunið greiða leið niður á aurkeiluna neðan við jökulinn. Búist er við að það gerist næstu daga.

Virkni gossins er mikil og gjóskuframleiðsla og sprengivirkni var í gær meiri en verið hefur undanfarna daga. Gosmökkurinn steig hærra en verið hefur að meðaltali síðustu daga og er dekkri, að sögn Björns Oddssonar, jarðfræðings á Jarðvísindastofnun Háskóla Íslands, sem var í eftirlitsflugi flugvélar Landshelgisgæslunnar yfir gosstöðvarnar.

Vísindamenn telja að íshaftið sem hraunið er að vinna á nú sé síðasta fyrirstaðan í Gígjökli. Fyrir neðan það sést lítil hola sem vatnið hefur brætt en leiðin ætti að vera greið niður hallann og á aurkeiluna við jökulröndina. Þar getur það runnið óhindrað á láglendi inn í farveg Markarfljóts.

Sjá nánar um eldgosið í Eyjafjallajökli, áhrif þess og afleiðingar, í Morgunblaðinu í dag.