Innlent | mbl | 16.5.2010 | 19:19

Sprunga undir Eyjafjallajökli?

Kort frá Veðurstofunni sem sýnir staðsetningu skjálftanna.

Haraldur Sigurðsson jarðfræðingur telur sennilegt að sprunga sé undir Eyjafjallajökli. Jarðskjálftar sem urðu þar á föstudaginn raði sér á nokkuð reglulega línu frá suðvestri til norðausturs.

Haraldur segir á heimasíðu sinni að jarðskjálftahrinan sem hófst á föstudaginn sé nokkuð óvenjuleg. „Fjórtán skjálftar röðuðu sér í nokkuð reglulega línu frá suðvestri til norðausturs, eins og kortið frá Veðurstofunni sýnir. Þetta er ekki í fyrsta sinn sem skjálftar hafa myndað þessa stefnu, en þetta er langgreinilegasta dæmið. Skjálftarnir eru allir fremur litlir, og eru allt frá 1 til 27 km dýpi. Sennilega fylgja þeir vel afmarkaðri sprungu, misgengi eða kvikugangi í jarðskorpunni. Þessi stefna er einmitt aðal sprungustefnan í suður hluta eystra gosbeltisins. Það er rétt að benda á að jarðskjálftar virðast stundum raðast á línur þegar fáir mælar eru virkir, en það á ekki við í þessu tilfelli. “