Biskup Íslands biður samkynhneigða afsökunar

Biskup Íslands, Karl Sigurbjörnsson.
Biskup Íslands, Karl Sigurbjörnsson. mbl.is/Ómar

Biskup Íslands, Karl Sigurbjörnsson, biðst fyrirgefningar vegna orða um hjónaband samkynhneigðra, sem hann lét falla árið 2006. Þá sagði hann að ef hjónabandið yrði ekki lengur skilgreint sem hjónaband karls og konu væri eitthvað nýtt orðið til og hið sígilda hjónaband „afnumið". Hugtakinu væri þar með hent á sorphaugana.

Hann hvetur fólk til að horfa fram á veginn og taka höndum saman um stofnunina hjónabandið, í ljósi þess að Alþingi hefur nú breytt hjúskaparlögum og leyft hjónaband samkynhneigðra. Þetta kemur fram í Fréttablaðinu í dag.„Orð mín í hita leiksins hafa valdið sárum og ég biðst fyrirgefningar á því," segir séra Karl Sigurbjörnsson. Mikið vatn hafi runnið til sjávar síðan.

„Þetta var tilvísun í að verið væri að gjörbreyta stofnun sem á sér mjög fornar rætur og skilgreiningu. Það var út af fyrir sig óheppilega orðað, eins og ýmsar athugasemdir sem falla í hita leiksins," segir biskup. Of mikið hafi verið gert úr þessum orðum sínum.
mbl.is