Enn eitt vindhögg ráðherrans

Sigurður Böðvarsson krabbameinslæknir hefur ákveðið að hætta störfum á Landspítalanum …
Sigurður Böðvarsson krabbameinslæknir hefur ákveðið að hætta störfum á Landspítalanum og flytja úr landi. Júlíus Sigurjónsson

Sigurður Böðvarsson krabbameinslæknir segir að viðbrögð Álfheiðar Ingadóttur heilbrigðisráðherra við ákvörðun hans um að flytja úr landi séu enn eitt vindhöggið í safn heilbrigðisráðherrans. 

„Með ummælum sínum hefur henni á einu bretti tekist að gera lítið úr
læknastéttinni og ítrekuðum viðvörunum lækna og áhyggjum af þróun
heilbrigðismála hér á landi.  Það verður að skoðast sem eftirtektarverður árangur  hjá æðsta yfirmanni heilbrigðismála á landinu,“ skrifar Sigurður í yfirlýsingu sem hann sendi mbl.is í kvöld.

Yfirlýsingin er svohljóðandi:

„Álfheiður Ingadóttir heilbrigðisráðherra gerir því skóna að á vefmiðlinum pressan.is  í dag 7. júlí, að undirritaður sé með einhverjum hætti að „blöffa“ í fjórða skipti og tilkynna um flutning til Bandaríkjanna væntanlega í einhverskonar þrá eftir athygli.

Nú þekkir Álfheiður aðstæður mínar vafalaust betur en ég, en sjálfan rekur mig ekki minni til að ég hafi áður ráðið mig til starfa sem krabbameinslæknir á sjúkrahúsi í Bandaríkjunum.  Að forfallalausu mun ég hefja þar störf í september og samningar þar að lútandi eru löngu undirritaðir og lögfræðingar sjúkrahússins vinna nú að því að útvega mér atvinnuleyfi.  

Gangi það ekki eftir mun ég vafalaust finna mér aðra vinnu. Eins
og fram kemur í viðtali við mig í Læknablaðinu nýlega voru drög að þessum fyrirhuguðu vistaskiptum mínum lögð fyrir þremur árum eða árið 2007 og hafa því lítið með hrun eða kreppu hér á landi að gera.

Mig langar einfaldlega að skipta um vinnu sem er í sjálfu sér ekki í frásögur færandi. Hugsanlega eru það þessi þrjú ár eða talan þrír sem ruglar ráðherra í ríminu og fær hana til að komast að rangri niðurstöðu í fljótfærni eins og henni er tamt. 

Í því sambandi er misheppnuð atlaga hennar að Steingrími Ara Arasyni forstjóra Sjúkratrygginga Íslands og einum vammlausasta embættismanni í þjónustu íslenska ríkisins mönnum í fersku minni, svo ekki sé minnst á hringlandaháttinn varðandi síðdegisvaktir á
heilsugæslustöðvum í Reykjavík undanfarnar vikur eins og þær þúsundir þekkja sem þurft hafa að leita sér læknis í höfuðborginni.

Læknafélag Íslands hefur á undanförnu ári ítrekað varað við þeirri þróun sem orðið hefur í mönnun lækna hér á landi, en skráðum læknum hér á landi hefur fækkað um 10% á einu ári. 

Þótt Álfheiði hafi með ástæðulausum skætingi sínum í minn garð tekist að bæta við enn einu vindhöggi í safn sitt verður ekki hjá því
litið að með ummælum sínum hefur henni á einu bretti tekist að gera lítið úr læknastéttinni og ítrekuðum viðvörunum lækna og áhyggjum af þróun heilbrigðismála hér á landi.  Það verður að skoðast sem eftirtektarverður árangur  hjá æðsta yfirmanni heilbrigðismála á landinu.“

Frétt Morgunblaðsins um mál Sigurðar

Sigurður Böðvarsson.
Sigurður Böðvarsson. Morgunblaðið/Frikki
Álfheiður Ingadóttir heilbrigðisráðherra.
Álfheiður Ingadóttir heilbrigðisráðherra. mbl.is/Sigurður Bogi
mbl.is
Fleira áhugavert
Fleira áhugavert