„Prestar eiga að kunna að þegja“

„Þögn getur verið gulls ígildi. Vitrir menn kunna ekki bara að orða hugsanir sínar. Þeir kunna líka að þegja. Prestar eiga að kunna að þegja. Í starfi sínu komast þeir að ýmsu sem ekki má tala um. Stundum er þeim trúað fyrir leyndarmálum í sálgæsluviðtölum. Þann trúnað verða þeir að halda," segir sr. Svavar Alfreð Jónsson, sóknarprestur Akureyrarkirkju, í nýjum pistli á vefnum tru.is. Fólk eigi að geta treyst sálusorgara sínum en jafnframt segir Svavar að þeir prestar sem þegi um barnaníð séu komnir í lið með níðingunum.

Svavar bendir á að prestar séu ekki eina stéttin sem þurfi að gæta sérstaklega vel að þagmælskunni. Sálfræðingar, læknar, kennarar og lögreglumenn verði til dæmis líka að kunna að þegja. Þá leggi blaðamenn mikla áherslu á að halda trúnað.

„Heyrt hef ég blaðamenn segja að frekar færu þeir í fangelsi en að bregðast trúnaði um heimildarmenn sína," skrifar sr. Svavar.

Hvergi minnst á þagmælsku

Hann segist við vígslu sína í Hóladómkirkju á sínum tíma hafa gefið loforð er nefnist vígsluheit. Það standi skrifað í helgisiðabók þjóðkirkjunnar og stundum lesi hann það til að minna sig á hverju hann lofaði. Í þessu vígsluheiti sé hvergi minnst á þagmælsku þótt hún sé mikilvæg. En meðal þess sem hann hafi lofað fyrir altari dómkirkjunnar sé að vaka yfir sálarheill þeirra sem honum er trúað fyrir og „styðja lítilmagna og hjálpa bágstöddum“ eins og það er orðað.

„Börn sem sæta ofbeldi af hendi þeirra sem helst ættu að veita þeim skjól eru lítilmagnar. Ég get varla hugsað mér meiri lítilmagna en slík börn, varnarlaus og minnimáttar, beitt viðbjóðslegu ofbeldi af þeim sem þau treysta og elska. Prestar sem hafa vitneskju um barnaníð en þegja yfir því eru komnir í lið með níðingunum. Og þeir hafa tekið afstöðu gegn lítilmagnanum í stað þess að styðja hann," skrifar Svavar og bætir við:

„Sú þögn er rof á vígsluheiti og brot á loforði sem prestarnir gáfu á helgum stað. Í vígsluheitinu lofaði ég því líka að „vera sannleikanum trúr í kærleika“. Þögnin getur verið gulls ígildi en stundum er ekki til hættulegri lygi en þögnin.“

• 10 blogg um fréttina

Bloggað um fréttina

• Ólöf de Bont: Stundum er hættulegasta lygin þögnnin
• Guðrún María Óskarsdóttir.: " Guð gefi mér æðruleysi.... "
• Haraldur Bjarnason: Fleiri prestar tjá sig
• Heimir Lárusson Fjeldsted: Ef staðreyndirnar eru þér ofviða, talaðu þá um annað
• Viggó Jörgensson: Engin ein leið rétt í öllum tilfellum.
• Ingibjörg Guðrún Magnúsdóttir: Ábyrgðar mikið hlutverk að vera Prestur...
• Sumarliði Einar Daðason: Ég er með smá sjónarhorn á þetta
• Ólafur Ragnarsson: "ekki mannlegir"
• Ómar Geirsson: Sönn orð sem koma að kjarna tilveru okkar.
• Svanur Gísli Þorkelsson: Eru prestar fulltrúar Guðs á jörðu?