Innlent | mbl | 9.10.2010 | 11:38

Óttast fólksfækkun á Sauðárkróki

Heilbrigðisstofnunin á Sauðárkróki mbl.is

„Ungir framsóknarmenn ætla að hittast við Heilbrigðisstofnunina á Sauðárkróki klukkan 16.00 í dag og ég á von á því að það verði flutt ávörp af því tilefni,“ segir Sigurður Árnason, einn hollvina stofnunarinnar. Sigurður segir einboðið að niðurskurðurinn muni leiða til fólksfækkunar á Sauðárkróki.

„Þetta er gjörningur sem félagið stendur fyrir en svo verður borgarafundur klukkan átta á mánudagskvöld í bóknámshúsi Fjölbrautaskóla Norðurlands vestra. Ég á ekki von á öðru en fjölmenni því að það er mikil reiði á staðnum og í héraðinu út af þessu,“ segir Sigurður sem er fyrrverandi sveitarstjórnarmaður í sveitarfélaginu Skagfirði.

Krefjast jafnræðis

„Við krefjumst þess að jafnræði verði gætts í þessum niðurskurði. Við vitum að það þarf að skera niður en við sættum okkur ekki við að landsbyggðin þurfi að taka á sig mest allan skellinn af því. Þetta mun að óbreyttu leiða til fólksfækkunar hér í sveitarfélaginu.“

Að sögn Sigurðar hefur þingmönnum kjördæmisins verið boðað til fundarins á mánudag en þeir eru Gunnar Bragi Sveinsson og Guðmundur Steingrímsson, Framsóknarflokki, Ásbjörn Óttarsson og Einar Kristinn Guðmundsson, Sjálfstæðisflokki, Guðbjartur Hannesson velferðarráðherra og flokkssystir hans Ólína Þorvarðardóttir í Samfylkingunni og Jón Bjarnason sjávarútvegsráðherra og flokkssystkini hans í Vinstri grænum, þau Ásmundur Einar Daðason og Lilja Rafney Magnúsdóttir.

Sigurður skrifaði harðorða grein um niðurskurðinn á vefinn feykir.is en þar birti hann netföng og símanúmer ofangreindra þingmanna.

Loks má nefna að sveitarstjórn Skagafjarðar mótmælir niðurskurðinum.