Stendur við útreikninginn

Menntaskólinn Hraðbraut er til húsa í Faxafeni.
Menntaskólinn Hraðbraut er til húsa í Faxafeni. mbl.is/Ómar

Ríkisendurskoðun stendur við útreikning sinn á ríkisframlögum til Menntaskólans Hraðbrautar og telur að ekki hafi verið sýnt fram á hann sé rangur. Skólastjóri Hraðbrautar sagði við mbl.is í gær að allir útreikningar á framlögum til skólans, þ.m.t. útreikningar Ríkisendurskoðunar, hefðu verið rangir.

Í athugasemd frá Ríkisendurskoðun segir að  ríkisframlög til framhaldsskóla miðist við fjölda svokallaðra nemendaígilda. Á tímabilinu 2003–2009 hafi fjöldi nemendaígilda hjá Hraðbraut verið verulega undir áætlun. Skólinn hafi hins vegar fengið greitt miðað við áætlunina. Samtals hafi ofgreidd ríkisframlög til skólans numið 192 milljónum króna á tímabilinu, samkvæmt útreikningi Ríkisendurskoðunar sem birtur sé í greinargerðinni.

„Ríkisendurskoðun telur að ekki hafi verið sýnt fram á að útreikningur stofnunarinnar á ofgreiddum ríkisframlögum til Hraðbrautar sé rangur. Stofnunin stendur við þennan útreikning,“ segir í athugasemdinni.

Bent er á að framlög til Hraðbrautar byggist á þjónustusamningi skólans við mennta- og menningarmálaráðuneytið. Eftir að greinargerð Ríkisendurskoðunar var birt hafi risið ágreiningur milli samningsaðila um túlkun á ákvæðum hans um fjárveitingar. Forsvarsmenn Hraðbrautar haldi því fram að samkvæmt samningnum hafi ríkið átt að greiða tiltekna fasta fjárhæð á ári til skólans vegna húsaleigu. Sé fallist á þetta sjónarmið lækki ofgreidd framlög til skólans um 10–15% miðað við útreikning í greinargerð Ríkisendurskoðunar.

Þá segir að ofgreidd framlög til Hraðbrautar hafi numið 126,1 milljón króna á tímabilinu 2004–2006. Forsvarsmenn Hraðbrautar og ráðuneytið hafi gert með sér samkomulag um að þessi skuld verði lækkuð um 92,1 milljón króna. Ríkisendurskoðun telji að ráðuneytið hafi ekki heimild til að gefa skuldina eftir.

Eftirlit verulega ábótavant

„Í greinargerð Ríkisendurskoðunar kemur fram að eftirliti með framkvæmd þjónustusamnings ráðuneytisins við Hraðbraut hafi verið verulega ábótavant. Fjárhagslegt uppgjör hafi aldrei farið fram þrátt fyrir skýrt ákvæði í samningnum.

Ríkisendurskoðun áréttar að mikilvægt er að stjórnvöld hafi virkt eftirlit með framkvæmd samninga sem þau hafa gert við aðila utan ríkiskerfisins og fela í sér fjárframlög í skiptum fyrir tiltekna þjónustu.

Ólíðandi er að þeir aðilar sem selja ríkinu þjónustu fái ofgreitt fyrir hana svo jafnvel muni tugum prósenta. Enn alvarlegra er ef slíkar ofgreiðslur uppgötvast ekki fyrr en mörgum árum eftir að stjórnvöld inntu þær af hendi,“ segir í athugasemdinni.

mbl.is