Það gekk á með éljum þegar Húsvíkingar kvöddu jólin nú undir kvöld, tveimur dögum síðar en ætlunin var. Álfakóngur- og drottning ásamt ýmsum furðuverum leiddu blysför bæjarbúa í éljaganginum frá íþróttahöllinni að brennunni.
Brennan var að venju á uppfyllingunni í suðurfjörunni og þegar þangað kom var hætt að snjóa og kveikt var í brennunni. Kiwanisklúbburinn Skjálfandi hélt glæsilega flugeldasýningu en það voru ungar knattspyrnukonur úr Völsungi sem sáu um dagskrána.