Einangrast vegna atvinnuleysis

Atvinnulausir innflytjendur sem eiga rétt á félagslegri aðstoð, annarri en atvinnuleysisbótum, neita sér oft um hana til að missa ekki möguleikann á að fá ríkisborgararétt.

Samkvæmt lögum mega umsækjendur um ríkisborgararétt ekki hafa þegið framfærslustyrk frá sveitarfélagi í tvö ár og því reyna margir að draga fram lífið á litlum sem engum tekjum.

Í umfjöllun um þessi mál í Morgunblaðinu í dag segir, að hætt sé við því að heilu fjölskyldurnar einangrist félagslega þar sem atvinnulaust foreldri situr heima með börnin, sem ekki eru send í tómstundastarf vegna kostnaðar og læra fyrir vikið enga íslensku. Ráðgjafi hjá Vinnumálastofnun segir að útlendingar standi verr að vígi en aðrir á vinnumarkaði.