Geir Ólafs afhendir Steingrími óútfylltan víxil

Geir Ólafsson bíður eftir að fá óútfylltan tékka undirritaðan af …
Geir Ólafsson bíður eftir að fá óútfylltan tékka undirritaðan af fjármálaráðherra. mbl.is/Guðmundur Rúnar Guðmundsson

„Ritarinn hans tók við víxlinum. Ég býst við að Steingrímur skrifi undir hann fyrir mig,“ segir Geir Ólafsson, söngvari, um óútfylltan víxil sem hann afhenti í fjármálaráðuneytinu í dag og var ætlaður Steingrími J. Sigfússyni fjármálaráðherra. Gerir hann þetta til að benda á óréttlæti Icesave-málsins.

Geir segist enn ekki búinn að ákveða hvað hann ætli að gera við féð né hversu há upphæðin verði á endanum en hann búist engu að síður við að Steingrímur skrifi undir víxilinn fyrir hann. „Kannski ég noti peninginn í hjálparstarf hér á landi,“ segir Geir.

„Ég er ekki þannig maður að ég fari og kasti eggjum. Maður þarf að vera kurteis og almennilegur. Ég vona að hann geti hitt mig á morgun svo við getum rætt þetta.“

mbl.is