Aukakolefnisgjald fallið um sjálft sig

Kristján L. Möller, formaður atvinnuveganefndar Alþingis. Mynd úr safni.
Kristján L. Möller, formaður atvinnuveganefndar Alþingis. Mynd úr safni. mbl.is/Kristinn

„Við ætlum ekki að vera með aukaskatt umfram Evrópu, við ætlum ekki að leggja á aukaskatt á aðföng eins og kol og koks og þar með er þetta fallið um sjálft sig," segir Kristján L. Möller, formaður atvinnuveganefndar Alþingis, eftir fund nefndarinnar í morgun um kolefnisgjaldið.

Telur Kristján að um einhvern misskilning eða mistök hafi verið að ræða í málinu, ekki hafi staðið til að skattleggja stóriðjufyrirtækin umfram það sem gerist í samkeppnislöndunum. Vel geti verið að orðalag í frumvarpi fjármálaráðherra hafi ekki verið nógu skýrt. Atvinnuveganefndin fékk til sín í morgun fulltrúa frá fjármálaráðuneytinu, Íslandsstofu og Samáli, Samtökum álframleiðenda.

„Eftir þessa yfirferð okkar get ég ekki séð með nokkru móti hvernig við ætlum að gera þetta án þess að brjóta þetta samkomulag við fyrirtækin og það grundvallaratriði að tvískatta ekki og skattleggja umfram aðra. Það er mitt mat að það eigi ekki að vera tvísköttun og þetta á ekki að vera hamlandi á samkeppni. Við ætlum ekki að ganga lengra en Evrópa," segir Kristján og ítrekar að þetta sé sitt mat á stöðunni, það sé fjármálaráðuneytisins að útfæra nánar hvernig staðið verður að kolefnisgjaldinu. Hann líti a.m.k. svo á að ekki standi til að leggja á stóriðjufyrirtækin sérstakt kolefnisgjald á aðföng eins og kol og koks frá ársbyrjun 2013.

„Ég átta mig ekki á hvernig þetta er komið inn, hvort um misskilning eða mistök er að ræða, en það kom skýrt fram frá fulltrúa fjármálaráðuneytisins að ekki hafi staðið til að hafa tvísköttun og ekkert annað skattaumdæmi umfram það sem er í Evrópu. Miðað við þetta, og að það standi heldur ekki til að brjóta samkomulagið frá 2009 útaf raforkunni, þá er þetta að mínu mati fallið um sjálft sig,“ segir Kristján.

„Komi þessi fyrirtæki hingað sem fyrst"

Hann gerir ráð fyrir að málið standi óbreytt inni í frumvarpi fjármálaráðherra, bandorminum svonefnda, og verði rætt við aðra umræðu um fjárlögin. Fulltrúar allra fyrirtækjanna, bæði úr ál- og kísiliðnaði, hafi verið vel meðvitaðir um hvað sé framundan í evrópska viðskiptakerfinu með losunarheimildir, ETS-kerfinu.

Hann segir að miðað við þau svör sem fengust á fundinum í morgun, muni t.d. kísilfyrirtækin fá sama samkeppniumhverfi hér og annars staðar, þau hafi fengið fjárfestingarsamning við íslenska ríkið og séu í viðræðum um orkukaup. Þau hafi verið lengra komin í sínum undirbúningi en hann hafi gert sér grein fyrir.

 „Ég bið þessi fyrirtæki bara hjartanlega velkomin og komi þau sem fyrst," segir Kristján að endingu í samtali við mbl.is.

mbl.is