Tillaga verður lögð fram á aukakirkjuþingi sem kemur saman 4. febrúar um að ekki verði viðhöfð rafræn kosning við kjör biskups Íslands. Kjörstjórn telur ákveðin tormerki á að kosningar verði rafrænar eins og starfsreglur kveða á um.
Pétur Kr. Hafstein, forseti kirkjuþings, hefur boðað til aukakirkjuþings þann 4. febrúar. Í bréfi hans til þingfulltrúa segir að kjörstjórn hafi sett fram „rökstuddar efasemdir um að fyllilega sé unnt að tryggja óbrigðula framkvæmd rafrænna kosninga samkvæmt starfsreglum nr. 1108/2011 um kosningu biskups Íslands og vígslubiskupa. Kjörstjórn beinir því til mín sem forseta kirkjuþings að kanna hvort unnt sé að breyta gildandi reglum um rafræna atkvæðagreiðslu.“