„Nei, ég hef ekki fengið bréfið í hendur og þekki það í rauninni bara af afspurn.“
Þetta segir Páll Magnússon, útvarpsstjóri, aðspurður hvort rétt sé að honum hafi borist bréf frá Stofnun Símonar Wiesenthals í Los Angeles í Bandaríkjunum þar sem kvartað var undan lestri Passíusálmanna á RÚV, en stofnunin segir sálmana innihalda um 50 neikvæðar skírskotanir til gyðinga.
Páll segist í Morgunblaðinu ætla að svara bréfinu með viðeigandi hætti þegar hann fær það í hendurnar. „Ég get í sjálfu sér ekki brugðist við einhverju erindi sem ég hef ekki fengið, en svona í fljótu bragði finnst mér þetta dálítið langsótt,“ segir Páll.