Árþúsund að bæta skaða uppblásturs

Það mun taka þúsundir ára að endurnýja þann jarðveg sem hefur tapast vegna uppblásturs á Íslandi. Þetta kom fram í erindi Jóhanns Þórssonar, sérfræðings hjá Landgræðslu ríkisins á málþingi á vegum Landgræðsluskóla Háskóla Sameinuðu þjóðanna sem haldið var í gær.

Jóhann sagði ennfremur að verulega hefði verið gengið á jarðveg frá því að Íslands byggðist og það sæist á því að jarðvegur væri mjög næringarrýr í mörgum landshlutum. Nefndi hann hálendið sérstaklega í því samhengi.

„Sums staðar hafa menn bókstaflega ofnýtt jarðveginn þannig að hann hefur blásið á brott,“ segir Jóhann í umfjöllun um mál þetta í Morgunblaðinu í dag.