Verjandi sofnaði við málflutning

Frá Héraðsdómi Reykjaness.
Frá Héraðsdómi Reykjaness.

Aðalmeðferð í máli ákæruvaldsins gegn Annþóri Kristjáni Karlssyni, Berki Birgissyni og átta öðrum stendur enn yfir. Málflutningur hefur dregist nokkuð á langinn sem sést einna best á því að vekja þurfti einn verjandann sem sofnaði í sæti sínu.

Á meðan einn verjenda hélt ræðu sína heyrðust hrotur sem svo gott sem yfirgnæfðu ræðuna. Fór þá dómsformaður fram á það að annar lögmaður, verjandi eins sakborninga, sem sofnaði yfir ræðunni yrði vakinn.

Farið var eftir því og hélt málflutningur áfram eins og ekkert hefði í skorist.

Enn er áætlað að málflutningi ljúki í dag en fjórir verjendur eiga enn eftir að flytja mál sitt auk þess sem öllum gefst kostur á andsvörum. Ennfremur ætla Annþór og Börkur að ávarpa dóminn í lokin.

Sökum þessa má búast við að aðalmeðferðin standi í dag fram á kvöld, nema dómari fresti málinu þar til á morgun.

mbl.is

Bloggað um fréttina