ESB þjarmar að Færeyingum

Frá Þórshöfn í Færeyjum.
Frá Þórshöfn í Færeyjum. mbl.is/Ómar Óskarsson.

Framkvæmdastjórn Evrópusambandsins hefur gefið stjórnvöldum í Færeyjum einn mánuð til þess að bregðast með ásættanlegum hætti við kröfum sambandsins um að þau falli frá einhliða kvótaúthlutun sinni í norsk-íslenskri síld. Þetta kemur fram á fréttavefnum Undercurrentnews.com.

Verði ekki brugðist við innan þess tíma hyggst framkvæmdastjórnin óska eftir því við ríki Evrópusambandsins að Færeyingar verði beittir refsiaðgerðum. Þær aðgerðir kunna að fela það í sér að færeyskum skipum verði meinað að landa síld í höfnum Evrópusambandsins og meðafla og að settar verði skorður við aðgengi þeirra að höfnum sambandsins nema vegna neyðartilfella að því er segir í bréfi sem framkvæmdastjórnin hefur sent stjórnvöldum í Færeyjum.

Slíkar aðgerðir kunna einnig samkvæmt bréfi framkvæmdastjórnarinnar að fela í sér aðrar takmarkanir sem væru til þess fallnar að tryggja að refsiaðgerðirnar skiluðu tilætluðum árangri. Þannig gætu þær þýtt að aðilum innan Evrópusambandsins væri bannað að festa kaup á fiskiskipi sem skráð væri í Færeyjum eða að skrá skip frá sambandinu í Færeyjum.

Einnig er hugsanlegt að ríkjum Evrópusambandsins verði bannað að selja tækjabúnað til Færeyja eða birgðir sem nýttar væru til síldveiða eða að lokað yrði á að einstök ríki innan sambandsins gætu samið um fiskveiðar í færeyskri lögsögu. Eins og fram kom í Morgunblaðinu á fimmtudaginn ætla Færeyingar hins vegar ekki að hvika frá áformum sínum um einhliða kvótaúthlutun í norsk-íslenskri síld þrátt fyrir hótanir Evrópusambandsins.

Ennþá er í skoðun hjá framkvæmdastjórn Evrópusambandsins að grípa til hliðstæðra refsiaðgerða gegn Íslandi og Færeyjum vegna makríldeilunnar en enn er verið að kanna lagalegan grundvöll slíkra aðgerða.

Frétt Undercurrentnews.com

mbl.is

Bloggað um fréttina