Stjórn Strætó bs. hefur ákveðið að fresta fyrirhuguðum gjaldskrárbreytingum, sem áttu að koma til framkvæmda 1. desember. Ákvörðun verður tekin um hvort af breytingunum verður þegar fjárlög liggja endanlega fyrir.
Í fréttatilkynningu frá Strætó segir að samkvæmt áætlun eigi að renna 956 milljónir króna frá ríkinu til almenningssamgangna á höfuðborgarsvæðinu árið 2014, út frá samningi ríkisstjórnarinnar og Samtaka sveitarfélaga á höfuðborgarsvæðinu um eflingu almenningssamgangna. Fjárlagafrumvarpið geri hins vegar aðeins ráð fyrir 822,6 milljónum króna í málaflokkinn.
Stjórn Strætó bs. mun taka ákvörðun um hvort gjaldskrá fyrirtækisins verður breytt þegar fyrir liggur hvert framlag ríkisins verður í fjárlögum 2014. Til stóð að hækka gjaldskrána að meðaltali um 7%, frá og með 1. desember, en, líkt og áður segir, hefur því nú verið frestað.
Bókun stjórnar Strætó bs., samþykkt á stjórnarfundi 29. nóvember 2013:
Stjórnin samþykkir að fresta áður samþykktri gildistöku gjaldskrárhækkunar og vísa málinu til frekari umfjöllunar þegar niðurstaða fjárlaga um framlag ríksins vegna samnings um eflingu almenningssamgangna á höfurborgarsvæðinu liggur fyrir.