„Nú þegar er kominn ræktunarstofn, 50 til 60 kanínur. Þær dafna vel og næsta sumar ættum við að verða komin með 1.500 sláturdýr,“ segir Birgit Kositzke, kanínubóndi í Húnaþingi vestra.
Sláturhús SKVH á Hvammstanga fékk í sl. viku leyfi Matvælastofnunar til kanínuslátrunar. Þar á bæ verður fljótlega hafist handa við að koma upp aðstöðu fyrir þessa starfsemi, sem er nýmæli á Íslandi
„Eftirspurn eftir kanínukjöti er vaxandi og markaðurinn til staðar, til dæmis á veitingahúsum og bændamörkuðum. Þetta er hvítt kjöt og magurt,“ segir Birgit í Morgunblaðinu í dag.