Innlent | mbl | 27.12.2013 | 10:34 | Uppfært 11:24

Spá stórhríð fyrir vestan

Ljósmynd/Vegagerðin

Veðurstofan hefur lýst yfir hættustigi vegna snjóflóða í Bolungarvík, utan þéttbýlis, Hnífsdal og Ísafirði. Lokað er um Eyrarhlíð vegna snjóflóðs. Vegna snjóflóðahættu er vegurinn um Súðavíkurhlíð lokaður.

Reikna má með stórhríð og veðurhæð um 20-25 m/s frá því um hádegi á Vestfjörðum, Ströndum, við Breiðafjörð og á utanverðu Snæfellsnesi. Þá lægir og rofar til á Norðurlandi, en hvessir aftur með samfelldri ofankomu síðdegis og þá einnig á Austurlandi.

Það er óveður á Kjalarnesi, undir Akrafjalli og við Ingólfsfjall. Það er hálka á Sandskeiði, hálka og skafrenningur á Hellisheiði og í Þrengslum. Þæfingur og óveður er á Mosfellsheiði, ófært og óveður er í Kjósarskarði, hálka eða hálkublettir eru annars víðast hvar á Suðurlandi.

Óveður í Staðarsveit

Hálka eða snjóþekja er á flestum leiðum á Vesturlandi og éljagangur mjög víða. Hálka og stórhríð er á Holtavörðuheiði, snjóþekja og stórhríð er á Bröttubrekku. Óveður er í Staðarsveit.

Þungfært og stórhríð er á Steingrímsfjarðarheiði. Ófært um Þröskulda en opið er um Innstrandaveg og þar er snjóþekja hálka og éljagangur. Snjóþekja og snjókoma er á Hálfdán og Mikladal en snjóþekja og éljagangur á Kleifaheiði. Ófært og stórhríð er frá Brjánslæk og yfir Klettsháls. Þungfært og stórhríð í Kollafirði og þæfingur í Reykhólasveit. Snjóþekja og skafrenningur er á Gemlufallsheiði og í Súgandafirði. Snjóþekja og skafrenningur er á Flateyrarvegi og varað er við snjóflóðahættu.

Á Norðurlandi er hálka, snjóþekja og snjókoma. Þæfingur og skafrenningur er á Þverárfjalli og Siglufjarðarvegi í Hofsós.

Loka leiðinni um Ólafsfjarðarmúla í kvöld

Þæfingur er með ströndinni í Dalvík, í Aðaldal og á Víkurskarði. Þæfingur er á Ólafsfjarðarmúla og varað er við snjóflóðahættu, veginum verður lokað klukkan 22:00 í kvöld.

Á Austurlandi er hálka, snjóþekja og skafrenningur en hálkublettir eru með ströndinni í Hvalnes.

Á Suðausturlandi er greiðfært frá Hvalnesi að Mýrdalssandi en hálkublettir þaðan að Steinum undir Eyjafjöllum.