Krónan styrkist milli áramóta

Gengi krónu gagnvart helstu viðskiptamyntum er mun sterkara en fyrir ári og má nefna að sl. föstudag var kaupgengi evru 158 krónur en var 168 krónur sama dag í fyrra. Kaupgengi bandaríkjadals var 115 krónur en 127 krónur fyrir ári.

Krónan veiktist á fyrstu vikum ársins og fór kaupgengi evru í tæpar 174 kr. 30. janúar sl. og dollars í um 128 kr., að því er fram kemur í fréttaskýringu um stöðu krónunnar í Morgunblaðinu í dag.

Spurður hvort þess sé að vænta að gengið veikist jafn mikið eftir áramót og í byrjun þessa árs segir Jón Bjarki Bentsson, hagfræðingur hjá Greiningu Íslandsbanka, að líkur séu á að gengið geti haldist nokkuð stöðugt næstu vikur.