„Auðvitað setur maður markið hátt en það er ekki þar með sagt að maður nái því. Ég varð eiginlega orðlaus,“ segir Adda María Jóhannsdóttir framhaldsskólakennari en hún lenti í þriðja sæti í flokksvali Samfylkingarinnar í Hafnarfirði í gær. Adda hefur ekki áður boðið sig fram fyrir flokkinn.
„Ég hef verið flokksbundin nokkuð lengi en ekki haft mig mikið frammi. Þetta framboð hefur blundað í mér frá síðustu sveitarstjórnarkosningum, þá var ég farin að velta þessu aðeins fyrir mér. Þá var ég að ljúka við meistaragráðu í alþjóðasamskiptum og fannst ég ekki hafa tíma til þess en nú fannst mér tími til kominn að skella mér í þetta,“ segir Adda.
„Ég byrjaði þetta í haust, fór að sækja fundi og hitta grasrótina og hlutirnir þróuðust frekar hratt.“ Hún segir flokksmenn í Hafnarfirði hafa tekið henni vel. „Þegar fólk hefur trú á manni þá eflist maður enn frekar. Við í fjölskyldunni ákváðum að fyrst ég væri að fara í framboð á annað borð þá myndum við gera þetta af fullum krafti og reyna að ná árangri.“
Aðspurð hvaða málefni brenni á mönnum í Hafnarfirði nefnir Adda húsnæðismál, skólamál og atvinnumál. „Mér sýnist sem þessir þrír póstar verði fyrirferðarmiklir í kosningabaráttunni framundan.“