„Ryðjast fram með látum og tillitsleysi“

Geysir í Haukadal.
Geysir í Haukadal. mbl.is/Kristinn Ingvarsson

Í yfirlýsingu frá nokkrum fyrirtækjum í ferðaþjónustu eru fyrirhugaðar gjaldtökur við ferðamannastaði harðlega gagnrýndar. „Með þessu ryðjast landeigendur fram með látum og tillitsleysi við atvinnugreinina, stefna ímynd landsins og áratuga þrotlausu markaðsstarfi í hættu,“ segir m.a. í yfirlýsingunni. 

Þar er rifjað upp að upp á síðkastið hafi landeigendur margra ferðamannastaða, s.s. Geysis, Námaskarðs, Leirhnjúka og Dettifoss, tilkynnt um fyrirhugaða gjaldtöku.

Þetta gagnrýna ferðaþjónustufyrirtækin og segja landeigendur virða að vettugi þær leikreglur sem gilda í alþjóðlegri ferðaþjónustu, þar sem fyrir löngu er búið að verðleggja og selja stóran hluta hópferða til Íslands árið 2014 og því ekki hægt að velta aðgangseyri að náttúruperlum út í verð ferðanna og þar með yfir á neytendur eftir á. „Það er því ljóst að ef fyrirætlanir landeigenda ná fram að ganga munu íslenskir ferðaskipuleggjendur og ferðaskrifstofur sitja uppi með tugmilljóna tjón sem getur  stefnt rekstrargrundvelli þeirra í hættu.“

Þá segir: 

Landeigendur ætla auk þess án þess að blikka auga að svipta íslenskan almenning þeim rétti að ferðast um landið hindrunarlaust og láta Íslendinga á ferð um landið sitt greiða aðgangseyri að náttúruperlum.

Það er fáum ljósara en þeim sem hafa það að lifibrauði að skipuleggja ferðir um Ísland, að aðgerða er þörf við viðhald og uppbyggingu ferðamannastaða. Það er óumdeilt og almennt viðurkennt, enda verið að vinna að heildstæðri lausn á verndun náttúruperla og uppbyggingu ferðamannastaða í samvinnu allra hagsmunaðila. Það gerir framgöngu landeiganda ennþá meira óviðeigandi.

Í næstu viku verða mörg af mikilvægustu fyrirtækjum íslenskrar ferðaþjónustu að kynna Ísland á stærstu ferðakaupstefnu heims ITB í Berlín. Þýskaland er einn mikilvægasti markaður fyrir Íslandsferðir í heiminum. Óvissuþættir á borð við yfirvofandi skatta og gjöld geta valdið ómældum skaða í sölu og markaðssetningu ferða til Íslands. Það vitum við af reynslu.

Með hagsmuni alls Íslands sem ferðamannalands  hljótum við því að  krefjast þess að stjórnvöld stöðvi afdráttarlaust þessar fyrirætlanir landeigenda og gefi tafarlaust út yfirlýsingu þess efnis. Við þurfum vinnufrið til að klára þetta mikilvæga mál þar sem ferðamannalandið Ísland er að veði.“

Undir yfirlýsinguna skrifa: 

  • Ferðaskrifstofan Atlantik – Gunnar Rafn Birgisson
  • Ferðaskrifstofan Snæland Grímsson – Hallgrímur Lárusson
  • Ferðaskrifstofan Terra Nova – Bjarni Hrafn Ingólfsson
  • Ferðaskrifstofan Katla DMI og Katla Travel GmbH – Bjarnheiður Hallsdóttir
  • Viator – Pétur Óskarsson
mbl.is

Bloggað um fréttina