Sakar bæjaryfirvöld í Hafnarfirði um leyndarhyggju

Frá Hafnarfirði.
Frá Hafnarfirði. mbl.is/Sigurður Bogi

Rósa Guðbjartsdóttir, oddviti Sjálfstæðisflokksins í Hafnarfirði, segir að bæjarstjórinn Guðrún Ágústa Guðmundsdóttir hafi neitað bæjarfulltrúum um gögn varðandi tilboð Íslandsbanka í endurfjármögnun á 13 milljarða skuldum bæjarins. 

Fram kemur í tilkynningu sem Rósa hefur sent á fjölmiðla, að bæjarfulltrúar Sjálfstæðisflokksins hafi ekki fengið þessi gögn afhent, þrátt fyrir að þeir eigi skýlausan rétt þeirra og ítrekaðar óskir þar um. 

Rósa segir að þetta sé ekki viðunandi í ljósi þess að ætlast sé til að málið verði afgreitt á næsta bæjarstjórnarfundi, þ.e. innan fárra daga. Hún segir ennfremur að það sé nauðsynlegt að bæjarfulltrúarnir fái gögnin því það hvíli krafa á öllum fulltrúum að standa eins faglega að verki við endurfjármögnunina og hægt er.

Hún spyr til til hvaða lánastofnana hafi verið leitað, hvaða önnur tilboð hafi verið uppi á borðum og svo framvegis.

Vill faglega umræðu um endurfjármögnun

„Bæjarfulltrúar Sjálfstæðisflokksins hafa engar upplýsingar haft um endurfjármögnunarferlið þar til þeim var munnlega kynnt niðurstaða þess á fundi í bæjarráði sl. fimmtudag,“ segir Rósa í tilkynningu.

„Lánið hjá Depfa er á gjalddaga í lok árs 2015 og því eðlilegt að endurfjármögnun fái þá faglegu umræðu og rýni sem svo stórvægilegt mál kallar eftir. Og ekki verður litið framhjá því að sporin hræða en þegar núverandi bæjarstjórnarmeirihluti samdi síðast við Depfa árið 2011 hvíldi mikil leynd yfir samningnum og mikið lá á að bjarga pólitísku andliti fulltrúa meirihlutans. Nú lítur út fyrir að sú leyndarhyggja sé enn við lýði,“ skrifar hún ennfremur.

Hafnarfjörður í skuldafjötrum

Þá segir hún að á undanförnum mánuðum hafi aðstæður í þjóðfélaginu og hjá innlendum fjármálastofnunum loks tekið að batna svo að hægt sé að breyta erlendu láni upp á milljarða króna í íslenskt, enda tekjur sveitarfélagsins allar í íslenskum krónum. Þessari breyttu stöðu beri að fagna, en bæjaryfirvöld verði að standa vörð um hagsmuni bæjarbúa sem verði gert að standa undir greiðslum endurfjármögnunarinnar. Kvaðir í væntanlegum samningi, sem lýst hafi verið á fundi bæjarráðs, um að ná skuldahlutfallinu mjög hratt niður á næstu árum séu afar íþyngjandi og vaxtabyrði eykst.

Rósa bendir á að skuldastaða Hafnarfjarðarbæjar sé þung og framlenging láns breyti ekki þeirri staðreynd að bæjarfélagið sé enn í skuldafjötrum. Þetta tiltekna lán, sem nú sé verið að framlengja, og það viðbótarlán sem sé verið að taka, til að fjármagna skammtímaskuldir, sé dapurlegur minnisvarði um slæma fjármálastjórn vinstri manna í bæjarstjórn Hafnarfjarðar. Skuldir bæjarfélagsins nemi nú um 40 milljörðum króna eða um 1.600 þúsund krónum á hvern íbúa. Og þeim sé velt hér áfram til hafnfirskra heimila og fyrirtækja.

Rósa Guðbjartsdóttir, oddviti Sjálfstæðisflokksins, í Hafnarfirði.
Rósa Guðbjartsdóttir, oddviti Sjálfstæðisflokksins, í Hafnarfirði.
mbl.is
Fleira áhugavert
Fleira áhugavert