Verkfalli framhaldsskólakennara er lokið en þeir skrifuðu undir nýjan kjarasamning við ríkið í húsi ríkissáttasemjara nú rétt í þessu. Yfir tuttugu þúsund framhaldsskólanemar munu því mæta í skólann á nýjan leik á mánudaginn.
Samningurinn nær til októbermánaðar 2016 og felur í sér sex prósent launahækkun. Aðrar hækkanir eru háðar nýju vinnumati, en geta gert það að verkum að hækkunin nemi samtals 29 prósentum yfir samningstímann.
Eftir á að leggja samninginn undir atkvæði félagsmanna í Félagi framhaldsskólakennara og Félagi stjórnenda í framhaldsskólum.
Kynningarfundi um efni samningsins lauk fyrr í dag í verkfallsmiðstöð kennara. Samninganefnd þeirra fór í kjölfarið á fund með samninganefnd ríkisins, þar sem gengið var frá nýgerðum samningi og hann staðfestur.