Dráttur gæti orðið á lækkun gjaldanna

Forystumenn samtaka launþega á almenna vinnumarkaðinum gagnrýna harðlega þá seinkun sem hefur orðið á afgreiðslu frumvarps fjármálaráðherra um gjaldskrárlækkanir.

Það felur í sér lækkun á bensíngjaldi, olíugjaldi, kílómetragjaldi, gjaldi af áfengi og tóbaki, kolefnisgjaldi og raforkuskatti um eitt prósentustig frá því sem ákveðið var í fjárlögum.

Það þýðir að í stað 3% hækkunar frá áramótum sem ákveðin var á fjárlögum vegna verðlagshækkana eiga þessi gjöld að hækka um 2% þegar lögin öðlast gildi. Lækkunin var ákveðin til að liðka fyrir gerð kjarasamninga í byrjun ársins og stuðla að stöðugra verðlagi, að því er fram kemur í umfjöllun um mál þetta í Morgunblaðinu í dag.