Seinasta fimmtudag skaut hópur meistaranema í verkfræði við Háskólann í Reykjavík eldflaugum á loft á Mýrdalssandi. Samkvæmt Ívari Kristinssyni, meistaranema í HR, sem er einn af þeim sem unnu að smíði eldflaugarinnar, varð þetta verkefni til sem hugmynd frá listamönnum frá New York og Púertó Ríkó.
„Þeir hafa áhuga á að senda rakettu upp til að mynda norðurljósin innan frá á leiðinni niður,“ sagði Ívar í samtali við mbl.is áður en eldflaugunum var skotið upp.
Eins og mbl.is greindi frá voru bæði GoPro-myndavélar og snjallsími tengd við eldflaugina og var hægt að fylgjast með skotinu í beinni útsendingu á vefnum.
Nú er komið myndband á Youtube sem sýnir hvað GoPro-vélarnar tóku upp.
„Myndbandið sýnir frá skoti númer tvö. Þar sést frá undirbúningnum, bæði í tjaldinu á Mýrdalssandi og hérna í skólanum, og skotið sjálft. Síðan koma þessi tvö GoPro-skot,“ segir Ívar um innihald myndbandsins. „Þau komu frá myndavélunum á eldflauginni. Annað þeirra er tekur niður með flauginni og hitt beint út úr hliðinni á henni. Það er svolítið gaman að sjá þetta á svona tvo mismunandi vegu.“
Myndbandið má sjá hér að neðan.
„Skjóta eldflaug af Mýrdalssandi“