Von var á Hval 9 til Hvalfjarðar um miðnætti í gær með tvær langreyðar sem veiddust í fyrrinótt. Þar með voru komnar 13 langreyðar á land eftir vikulanga hvalvertíð.
„Þetta er mjög gott,“ sagði Gunnlaugur F. Gunnlaugsson, stöðvarstjóri í Hvalstöðinni, um veiðarnar það sem af er. Hvalur 8 var á miðunum um miðjan dag í gær í leit að hval. Gunnlaugur sagði að hvalirnir hefðu til þessa verið mjög góðir miðlungshvalir.
Ekki hefur viðrað vel til hvalveiða undanfarið og skyggni verið lélegt á hvalamiðunum. Allt byggist á því á hvalveiðum að skyggni sé gott svo sjáist til hvalanna.