Mikil hey en misjöfn gæði

Útlit er fyrir að hey verði mikil eftir sumarið en þau verða misjöfn að gæðum. Vegna óþurrka sunnanlands og vestan sprettur grasið úr sér eða hrekst á túnum og fóðurgildi þess minnkar dag frá degi.

Kúabændur sem náðu að slá snemma og nýta þurrka í júní fengu mikil og góð hey. Þeir eiga sömuleiðis von á góðum háarheyskap vegna þess að grasið vex áfram í hlýindum og úrkomu.

Bændur sem ekki náðu að nýta þurrkana í júní hafa átt í erfiðleikum með heyskap því lítið hefur verið um þurrk í júlímánuði. Þetta á við um marga sauðfjárbændur sem beittu tún sín í vor. Einhverjir náðu að bjarga sér um helgina.

Í umfjöllun um heyskap í Morgunblaðinu í dag kemur fram, að ástandið er allt annað norðanlands og austan.