Hvorki Lyme-sjúkdómur né heilabólga hafa verið staðfest hér á landi af völdum bits skógarmítla innanlands. Þetta segir sóttvarnarlæknir sem veitir einnig upplýsingar um fyrirbyggjandi aðgerðir gegn biti af völdum skógarmítla og hvernig fjarlægja á skógarmítla af húð.
Mbl.is hefur að undanförnu greint frá sögum tveggja karlmanna sem bitnir voru af skógarmítli og veiktust mikið eftir það. Annars vegar er það sænski blaðamaðurinn Svante Liden og hins vegar Brandur Bjarnason Karlsson.
Á vefsvæði Landlæknis er haft eftir sóttvarnarlækni að hvorki Lyme-sjúkdómur né heilabólga hafi verið staðfest hér á landi af völdum bits innanlands. Bit af völdum skógarmítla getur valdið aðallega tvenns konar sjúkdómum; Lyme-sjúkdómi sem orsakast af bakteríu (borrelíu) og heilabólgu sem orsakast af veiru. Engin bóluefni eru til gegn Lyme-sjúkdómi en bóluefni er til gegn heilabólgu.
Upplýsingar um fyrirbyggjandi aðgerðir gegn biti af völdum skógarmítla og hvernig fjarlægja á skógarmítla af húð má finna á heimasíðu Embættis landlæknis:
Borrelíósa - Lyme-sjúkdómur (skógarmítill)