Andlát: Kjartan Sveinsson

Kjartan Sveinsson byggingatæknifræðingur lést á Landspítalanum í Fossvogi laugardaginn 27. september síðastliðinn, 88 ára að aldri. Hann fæddist 4. september 1926 á Búðareyri við Reyðarfjörð, sonur Sveins Jónssonar verslunarmanns og Guðnýjar Pálsdóttur húsfreyju.

Kjartan lauk gagnfræðaprófi 1945. Hann lærði húsasmíði hjá Tómasi Vigfússyni byggingameistara 1946-1950 en haustið 1950 fór hann til Svíþjóðar og nam við lýðháskóla í boði Norræna félagsins. Árið 1952 hóf hann nám í byggingatæknifræði við Katrineholms Tekniska skola í Svíþjóð, sem hann lauk 1955.

Kjartan hóf störf á teiknistofu Húsameistara Reykjavíkur 1955, þar sem hann vann meðal annars með Einari Sveinssyni og Gunnari Ólafssyni. Þar starfaði hann í sex ár en stofnaði eigin teiknistofu 1961 og rak hana í 43 ár. Eftir hann liggja teikningar að um það bil 5.000 einbýlishúsum og raðhúsum og 10.000 íbúðum í fjölbýlishúsum. Þá teiknaði hann Hótel Örk í Hveragerði og fjölda skóla ásamt skrifstofu- og iðnaðarhúsnæði. Kjartan var afar farsæll í starfi og eftirsóttur hönnuður og þekktur fyrir þann stíl sem einkennir mörg húsa hans. Hafa þau meðal annars verið kölluð Kjartanshús, en hann varð einna fyrstur manna hér á landi til að skreyta einbýlishús með súlum.

Kjartan og eftirlifandi eiginkona hans, Hrefna Kristjánsdóttir, ráku saman Bón- og þvottastöðina í Sóltúni í 37 ár, frá 1969-2006, þegar þau seldu fyrirtækið.

Kjartan var mikill skautamaður og keppti meðal annars við kanadíska hermenn í skautastökki á yngri árum og hafði sigur. Eftirlifandi börn Kjartans eru Þórarinn, Álfheiður og Arndís en fósturdóttir Kjartans er Sigfríð Þórisdóttir.

Útför Kjartans verður gerð frá Hafnarfjarðarkirkju kl. 15 föstudaginn 3. október.