Gísli Gíslason, hafnarstjóri Faxaflóahafna, lítur svo á að erindi sem Faxaflóahafnir sendu innanríkisráðherra, sjávarútvegsráðherra og utanríkisráðherra í kjölfar komu færeyska skipsins Nærabergs hingað til lands í lok ágústmánaðar sé efnislega fullkomlega ósvarað og ráðuneytin vísi hvert á annað.
Skipið fékk að koma til hafnar í Reykjavík en vélarbilun hafði komið upp í skipinu.
Næraberg veiðir makríl í grænlenskri lögsögu og mátti það hvorki koma til hafnar eða fá hefðbundna þjónustu, svo sem vatn, olíu, rafmagn og viðhald á skipi á grundvelli fyrstu milligreinar þriðju greinar laga um veiðar og vinnslu erlendra skipa í fiskveiðilandhelgi Íslands.
Í fyrstu átti ekki að veita skipinu neina þjónustu, jafnvel þó að það væri olíulítið og vélarbilun hefði komið upp í skipinu sem gerði það að verkum að skipið hafði ekki afl til að sigla á sama hraða og venjulega.
Þetta vakti nokkra athygli og fjölluðu færeyskir fjölmiðlar meðal annars um málið. Að lokum var þó ákveðið að skipið fengi fulla þjónustu.
Í erindinu sem sent var til ráðherranna voru þrjár spurningar. Í fyrsta lagi var spurt um hvaða lagaheimildir gildi vegna bann á sölu og þjónustu til skipa sem komin eru til hafnar hér á landi.
Í öðru lagi var spurt hvort Hoyvíkursamningurinn leiði til þess að önnur réttarstaða sé gegn færeyskum skipum en öðrum skipum, en samningurinn er fríverslunarsamningur á milli Íslands og Færeyja.
Í þriðja lagi vildu Faxaflóahafnir vita hvort ríkið beri ábyrgð á kostnaði sem kann að hljótast af kyrrsetningu skipa í höfnum hér á landi.