Einar Torfi Finnsson fjallaleiðsögumaður er í gönguskíðaferð á suðurpólnum ásamt þremur öðrum. Þeir halda jólin á Thiels Corner en þangað komu þeir seint í gærkvöldi. Ferðalagið er nú hálfnað en þeir hafa verið á göngu í mánuð og lagt að baki 578 kílómetra.
Einar Torfi lagði að stað frá Íslandi þann15. nóvember en með honum eru í för eru Breti, Ástrali og Kanadamaður. Einar Torfi vinnur hjá Íslenskum fjallaleiðsögumönnum sem skipuleggja ferðina í samstarfi við Adventure Consultants.
Þegar mbl.is ræddi við Einar síðdegis í dag voru þeir staddir á 85 breiddargráðu í hægri sunnanátt og sól. Það er 15 stiga frost hjá þeim og segir Einar að veðrið verði vart betra á þessum slóðum. Þeir ætla að gera sér dagamun í mat í kvöld og verður þríréttað og nammi á eftir matnum. Þrátt fyrir að á Thiels Corner sé flugbraut, eldneytisstöð og klósett er enginn þar nema þeir fjórir. Fjórmenningarnir komu hingað um tíuleytið að íslenskum tíma í gærkvöldi og hafa tekið því rólega í dag. Eins á Einar von á því að þeir hvíli á morgun enda ekki tekið pásu nema einn dag frá því ferðin hófst.
Ferðalagið hefur gengið ágætlega frá því fjórmenningarnir lögðu af stað á skíðum á hádegi 24. nóvember. Fyrstu dagarnir voru erfiðastir, bæði voru menn að aðlagast því að ganga lengi á skíðum með mikinn farangur, auk þess sem veðrið var ömurlegt.
Einar segir að það hafi reynt töluvert á að ganga á milli 83 og 84 gráðu vegna hárra rifskafla. Eins hafi snjóblinda gert þeim erfitt fyrir.
Landslagið á suðurpólnum er fremur tilbreytingarlaust eða nánast endalaus ísbreiða. En leiðin yfir Thiel-fjöll þykir ágætis tilbreyting á ferðalaginu.
Einar segir að þegar nær dregur sjálfum pólnum verði nánast enginn munur á sólarhæðinni og nánast hægt að velja sér hvað klukkan er.
„Maður ræður hvenær á dagurinn á að byrja en á pólnum mætast öll tímabelti og því minnsta mál í heimi að hoppa yfir daglínuna. Þetta er eini staðurinn í heiminum þar sem þú getur skipt um dag með því að taka eitt skref, og farið svo aftur yfir á fyrri daginn,“ segir Einar.
Áætlað er að ferðalagið á ísnum taki á milli 50-60 daga en heildarvegalengdin er um 1100 km og hækkunin er um 2.800 metrar en ferðinni lýkur í bandarískri rannsóknarstöð, Amundsen-Scott-stöðinni á suðurpólnum.