Ekki er hægt að kenna börnum og unglingum ábyrga netnotkun í grunnskólum og á sama tíma banna notkun snjalltækja.
Það er engin lausn að banna notkunina í skólum, lausnin felst í því að setja reglur og kenna á tækin. Þetta sagði Sigurður Haukur Gíslason, grunnskólakennari og MA-nemi í upplýsingatækni, í erindi sem hann hélt á morgunverðarfundi samtakanna Náum áttum í gær.
„Stafræn borgaravitund er útvíkkun á hugtakinu ábyrg netnotkun. Hún felst m.a. í að þeir sem eru á netinu sýni þar ábyrga hegðun varðandi tækin og rafræn samskipti,“ segir Sigurður í umfjöllun um mál þetta í Morgunblaðinu í dag.