Skortir tækifæri á Íslandi

Straumur íslenskra ríkisborgara úr landi á öldinni er vísbending um skort á störfum fyrir háskólamenntað fólk á íslenskum vinnumarkaði.

Þetta er mat Ásgeirs Jónssonar, dósents í hagfræði við Háskóla Íslands, en tilefnið er nýjar tölur Hagstofunnar sem sýna að innflytjendur eru að baki nærri helmingi íbúafjölgunar á Íslandi frá aldamótum.

Í umfjöllun um mál þetta í Morgunblaðinu í dag telur Ásgeir að byggðavandi Íslands hafi breyst úr því að vera brottflutningur úr dreifbýli til höfuðborgarsvæðisins í að vera brottflutningur ungs fólks úr landi. Unga fólkið „sé að mennta sig burt“. Hár húsnæðiskostnaður hafi líka áhrif.