Hæstiréttur staðfesti í dag dóm Héraðsdóms Norðurlands yfir Hallbirni Hjartarsyni tónlistarmanni, en hann var dæmdur í þriggja ára fangelsi 20. maí sl. fyrir kynferðisbrot gegn tveimur drengjum.
Ákæruvaldið hafði farið fram á að refsing Hallbjarnar yrði þyngd en hann fór fram á sýknu, en til vara að refsing yrði milduð. Þá krafðist hann þess að einkaréttakröfum yrði vísað frá héraðsdómi, en til vara að þær yrðu lækkaðar.
Hæstiréttur komst að þeirri niðurstöðu að dómur héraðsdóms skyldi standa óraskaður um annað en einkaréttarkröfur. Dæmdi hann Hallbjörn til að greiða drengjunum hvorum fyrir sig 1,5 milljón króna með vöxtum. Þá var honum gert að greiða allan áfrýjunarkostnað málsins.
Hallbjörn var ákærður fyrir að hafa á árinu 1999 kysst annan drenginn á heimili sínu tungukossi og fróað honum. Þá hafi hann í lok árs 2000 eða á árinu 2001, á heimili drengsins, kysst hann tungukossi, strokið ber kynfæri hans og haft við hann munnmök og látið drenginn fróa sér.
Þá var hann ákærður fyrir að hafa í tugi skipta er hinn drengurinn var á aldrinum 7 til 18 ára gamall kysst hann tungukossi og káfað utanklæða á kynfærum hans og rassi á heimili sínu.
Hallbjörn dæmdur í 3 ára fangelsi