„Þetta sýnir þörfina fyrir lög varðandi staðgöngumæðrun,“ segir Soffía Frans­iska Rafns­dótt­ir Hede, talskona sam­tak­anna Staðganga, um mál íslenskra hjóna sem hafa stefnt íslenska ríkinu og þjóðskrá til að fá stöðu sína viðurkennda.

Hjónin komu með tvíbura til Íslands í maí 2014, sem þau höfðu eignast með aðstoð staðgöngumóður í Bandaríkjunum. Konunni er þó neitað um staðfestingu á því að hún sé móðir barnanna í lagalegum skilningi en faðerni barnanna er viðurkennt. 

Þetta er fyrsta mál af þessu tagi sem höfðað er hér á landi. Önnur hjón sem einnig eignuðust tví­bura með aðstoð staðgöngumóður í Banda­ríkj­un­um, eru með sam­bæri­legt mál í und­ir­bún­ingi. 

Þurfa að ættleiða eigið barn

„Það er sorgleg staðreynd að langflest lagaleg mál varðandi staðgöngumæðrun eru mál við ríkið. Það eru yfirleitt allir sáttir við framkvæmdina en ríkin viðurkenna ekki foreldraréttinn,“ segir Soffía, og bendir á mál hjóna í Frakklandi, sem hafa barist fyrir þessari staðfestingu í tíu ár.

Eins og staðan er í dag þarf móðirin að ættleiða barnið, en slíkt getur tekið nokkur ár. „Þetta er mjög alvarlegt fyrir stöðu barnsins því það er þá í forsjá aðila sem hefur ekkert lagalegt vald til að taka ákvarðanir fyrir barnið og ekki forræði yfir því. Er það hagur barnsins?“ segir Soffía.

Mikilvægt að rammi verði settur

Staðgöngu­mæðrun er ólög­leg á Íslandi en frum­varp um staðgöngu­mæðrun í vel­gjörðarskyni hef­ur verið lagt fram til um­sagn­ar. Að sögn Soffíu er mikilvægt að málefnaleg umræða fari fram þegar frumvarpið verður tekið fyrir síðar í mánuðinum, og rammi verði settur.

„Það er mjög mikilvægt að það verði sett lög um þetta. Íslendingar eru að gera þetta og það hefur verið ljóst í einhvern tíma, svo það þarf skýran lagalegan ramma í kringum það.“

„Þetta er mjög sorglegt“

Samkvæmt drögunum að frumvarpinu verður ennþá ólöglegt að fara erlendis og greiða fyrir aðstoð staðgöngumóður. Reykja­vík viku­blað greindi frá því að Útlend­inga­stofn­un vissi um dæmi þess að fólk sem lét er­lenda staðgöngumóður ala sér barn hafi reynt að leyna því þegar komið var með barnið til Íslands.

„Þetta er mjög sorglegt þegar allir eru sáttir við framkvæmdina og allt hefur gengið vel. Það er alveg ömurlegt að þurfa að standa í lagalegum málum sem þessum,“ segir Soffía.

Soffía Frans­iska Rafns­dótt­ir Hede, talskona Staðgöngu.

Tengdar fréttir

Staðgöngumæðrun

Hópur staðgöngumæðra í varðhaldi

• Amma fær að ganga með barnabarn
• Sökuð um að stunda ólögleg viðskipti með börn
• Ákveðið eftir páska
• Íhuga að fara með málið fyrir Mannréttindadómstólinn

» Fleiri tengdar fréttir

• 1 blogg um fréttina

Bloggað um fréttina

• Guðmundur Ásgeirsson: Engin þörf á lögum um staðgöngumæðrun