Innlent | mbl | 4.6.2015 | 11:32

Lýsa sig vanhæfa í máli Ólafs

Ólafur Ólafsson. mbl.is/Þórður Arnar

Tveir nefndarmenn og einn varamaður í endurupptökunefnd hafa lýst sig vanhæfa til þess að fjalla um beiðni Ólafs Ólafssonar um að Al Thani-málið svonefnda verði tekið til meðferðar og dómsuppsögu að nýju.

Viðskiptablaðið greindi frá því í dag að Björn L. Bergsson, formaður nefndarinnar, Þórdís Ingadóttir og Sigurður Tómas Magnússon, varamaður Þórdísar í nefndinni, hefðu ákveðið að víkja sæti vegna vanhæfis í málinu.

Þórólfur Jónsson, lögmaður Ólafs, segir í samtali við mbl.is að þess sé einnig krafist að Kristbjörg Stephensen borgarlögmaður, sem tekur sæti í nefndinni stað Björns, víki sæti vegna vanhæfis.

Hann vísar til umfjöllunar Viðskiptablaðsins í aprílmánuði þar sem fjallað var um vinskap Kristbjargar og Bjargar Thorarensen, eiginkonu Markúsar Sigurbjörnssonar, forseta Hæstaréttar, en hann var einn dómara í Al Thani-málinu.

Það er því með öllu óljóst hvenær endurupptökunefndin tekur mál Ólafs fyrir, enda þarf dómstólaráð fyrst að tilefna nýjan nefndarmann vegna vanhæfis Þórdísar og Sigurðar Tómasar og í kjölfarið þarf nefndin að taka afstöðu til hæfis Kristbjargar.

Í frétt Viðskiptablaðsins segir að Þórdís sé persónulegur vinur Björns Þorvaldssonar, saksóknara í málinu, og þá hafi Sigurður Tómas starfað sem ráðgjafi fyrir sérstakan saksóknara frá árinu 2009.

Sönnunargögn ranglega metin

Endurupptökunefnd skipa þrír nefndarmenn og þrír varamenn. Af aðalmönnunum er einn tilnefndur af Hæstarétti, annar af dómstólaráði og sá þriðji er kosinn af Alþingi. Eins og áður sagði mun Kristbjörg taka sæti Björns og dómstólaráð skipa nýjan nefndarmann, en þriðji aðalmaðurinn er Elín Blöndal, lögfræðingur hjá Háskóla Íslands.

Ólafur óskaði eftir því við endurupptökunefnd í seinasta mánuði að Al Thani-málið svonefnda yrði tekið til meðferðar og dómsuppsögu að nýju hvað hann varðar. Helsta ástæðan fyrir beiðninni er sú að í dómi Hæstaréttar hefi sönnunargögn í málinu verið ranglega metin. Það hefði haft veigamikil áhrif á niðurstöðu dómsins sem dæmdi Ólaf til fjögurra og hálfs árs fangelsisvistar fyrir markaðsmisnotkun.

Að mati Ólafs lagði Hæstiréttur rangt mat á símtal tveggja manna, þar sem annar vísar til samtals við ótilgreindan mann sem kallaður var „Óli“, um tiltekna þætti viðskiptanna sem málið tók til. Í vitnisburðum fyrir héraðsdómi og öðrum sönnunargögnum málsins hafi komið skýrt fram að þarna var átt við Ólaf Arinbjörn Sigurðsson lögmann. Þrátt fyrir þessa staðreynd hafi Hæstiréttur talið að vísað hafi verið til Ólafs Ólafssonar.

Í yfirlýsingu sem verjandi Ólafs sendi frá sér sagði að um grundvallaratriði væri að ræða. Af umræddu símtali væri sú ranga ályktun dregin að Ólafur Ólafsson hefði verið upplýstur um tiltekna þætti viðskiptanna, þrátt fyrir að fyrirliggjandi gögn sýndu annað. Ekkert annað í málinu sýndi fram á meinta vitneskju Ólafs um þessi atriði. Þessi ranga forsenda væri hornsteinninn að sakfellingu Ólafs í dómi Hæstaréttar sem telur að á grunni símtalsins sé hafið yfir skynsamlegan vafa að Ólafur Ólafsson skyldi njóta arðs til jafns við Al Thani.

Ólafur var sakfelldur í málinu ásat þeim Hreiðari Má Sigurðssyni, Sigurði Einarssyni og Magnúsi Guðmundssyni. Hreiðar Már var dæmdur í fimm og hálfs árs fangelsi, Sigurður í fjögur ár og þeir Ólafur og Magnús í fjögurra og hálfs árs fangelsi.