Héraðsdómur Austurlands hefur úrskurðað hollenskt par í tveggja vikna gæsluvarðhald vegna rannsóknar á umfangsmiklu fíkniefnasmygli. Parið var handtekið eftir að verulegt magn fíkniefna fannst húsbíl þeirra um borð í Norrænu, sem kom til Seyðisfjarðar í gær.
Fjölmiðlar hafa greint frá því að um hvítt efni sé að ræða og talið sé að magnið sé á bilinu 70-90 kíló. Rannsóknin er á forræði lögreglunnar á Austurlandi, sem hefur hvorki viljað gefa upplýsingar um heildarmagnið né hvers konar efni sé að ræða. Það á hins vegar eftir að fara í efnagreiningu.
Lögreglan segir hins vegar að magnið sé verulegt og ljóst þykir að þetta sé einn mesti fíkniefnafundur í Íslandssögunni.
Fram kemur á vef RÚV að, parið hafi verið flutt til Reykjavíkur í dag.
Lögreglan á Austurlandi sendi frá sér eftirfarandi tilkynningu nú á sjöunda tímanum:
„Við komu ferjunnar Norrönu til Seyðisfjarðar þann 8. þ.m. var lagt hald á verulegt magn fíkniefna. Málið var unnið í samstarfi lögreglustjórans á Austurlandi, embættis Tollstjóra, lögreglunnar á Höfuðborgarsvæðinu og færeyskra tollayfirvalda.
Erlent par á fimmtugsaldri var handtekið í þágu rannsóknar málsins og hafa þau verið úrskurðuð í 14 daga gæsluvarðhald.
Rannsókn málsins er á frumstigi og frekari upplýsingar verða ekki veittar að svo stöddu.“