Ernir fjölgar ferðum og bætir við sig vél

Vegna stóriðjuframkvæmda á Bakka og aukinnar ferðaþjónustu í Þingeyjarsýslum hefur Flugfélagið Ernir orðið að fjölga ferðum til Húsavíkur.

Núna eru farnar 14 ferðir á viku frá Reykjavík en þær verða 20 í vetur. Farþegafjöldi fer úr 12 þúsund á þessu ári í 20 þúsund á næsta ári, ef áætlanir ganga eftir. Vegna þessa er Ernir að bæta við sig fjórðu 19 sæta farþegavélinni.

Framkvæmdir vegna Bakka munu á næstu 2-3 árum skapa vel yfir 700 störf. Heildarfjárfesting er um 80 milljarðar króna, að því er fram kemur í samtali við forstjóra Ernis og fréttaskýringu í Morgunblaðinu í dag.