Á fjallvegum suðvestan- og vestanlands verða krapaél síðdegis og frystir undir kvöld. Almennt kólnar í kvöld og nótt og hitinn fer þá niður fyrir frostmark á ný víða um land. Greiðfært er að mestu suðvestanlands en þó eru hálkublettir á Sandskeiði.
Þetta kemur fram í tilkynningu frá Vegagerðinni.
Þar segir einnig að vind lægi smám saman á landinu í dag, um leið og lægðin grynnist og fjarlægist landið vestur af.
Um færð og aðstæður segir:
Greiðfært er að mestu suðvestanlands en þó eru hálkublettir á Sandskeiði.
Hálkublettir eru víða á Vesturlandi. Auður vegur er við Hafnarfjall og að mestu á Snæfellsnesi en hálka er þó á Fróðárheiði.
Slæmt veður er enn á Vestfjörðum og eru því nokkrir fjallvegir enn lokaðir.
Fara þarf um merkta hjáleið í Blönduhlíð í Skagafirði og því verða einhverjar umferðartafir þar í dag og næstu daga. Norðvestanlands er víða hálka eða hálkublettir en krapi á Öxnadalsheiði.
Norðaustanlands er hálka eða flughálka.
Á Austurlandi er flughálka á láglendi en hálka á flestum fjallvegum. Flughált er þó á Vopnafjarðarheiði og óveður.
Suðaustanlands er greiðfært.