Vísbendingar eru um að laun lækna og hjúkrunarfræðinga á Íslandi séu orðin hærri en í Danmörku, Noregi og Svíþjóð. Það hefur áhrif á þennan samanburð að gengi íslenskrar krónu hefur styrkst og þessar stéttir samið um launahækkanir á Íslandi.
Laun þessara tveggja stétta í löndunum fjórum eru borin saman í Morgunblaðinu í dag.
Miðað er við tölur á vefjum hagstofa Danmerkur, Noregs og Svíþjóðar og á vef fjármála- og efnahagsráðuneytisins á Íslandi. Þær tölur eru síðan framreiknaðar miðað við spár Efnahags- og framfarastofnunarinnar, 2015-16, og kjarasamninga hér. Til dæmis eru samanlögð meðallaun lækna á Íslandi nú ríflega 1.400 þúsund krónur á mánuði, eða um 400 þúsund krónum hærri en í Danmörku, sem er í öðru sæti.
Eru þá borin saman heildarlaun lækna á Íslandi og föst mánaðarlaun í Danmörku, Noregi og Svíþjóð.
Hannes G. Sigurðsson, aðstoðarframkvæmdastjóri Samtaka atvinnulífsins, telur samanburð á heildarlaunum á Íslandi og grunnlaunum í hinum löndunum þremur gefa skýrari mynd en samanburður á grunnlaunum. Greiðslur fyrir yfirvinnu og vaktaálag séu enda mun stærri hluti heildarlaunagreiðslna á Íslandi.