Íslensk kona á fertugsaldri, sem ákærð var fyrir alvarlega líkamsárás í Ungverjalandi í fyrra, hefur verið fundin sek í dómstól ytra. Konan er dæmd í fimm ára skilorðsbundið fangelsi. Þetta kemur fram á ungverska fréttavefnum Debrecen Sun.
Konan, sem var við læknisnám í borginni Debrecen, var sökuð um að hafa byrlað vinkonu sinni svefnlyf og barið hana í höfuðið með hamri. Lögfræðingur konunnar hefur sagt að málsmeðferðin hafi öll verið hin undarlegasta.
Atvikið átti sér stað sumarið 2012. Samkvæmt ákærunni, sem lýst er í ungverskum miðlum, voru hin ákærða og fórnarlambið góðar vinkonur. Kvöld eitt hafi hin ákærða boðið vinkonu sinni, sem er frá Nígeríu, í mat. Þá hafi hún verið búin að setja svefnlyf í mat vinkonunnar.
Í frétt Debrecen Sun kemur fram að fórnarlambið hafi ekki verið viðstödd réttarhaldið, en þrír fyrrum framburðir hennar og vitnaskýrslur átta vitna voru talin grunnur fyrir sakfellingu.
Hægt er að áfrýja niðurstöðunni.
Frétt mbl.is: Ákærð fyrir manndrápstilraun
Frétt mbl.is: Uppspuni hjá fórnarlambinu
Frétt mbl.is: Lækninum hefur ekki verið sagt upp
Frétt mbl.is: Í leyfi frá störfum vegna ákæru