Það kólnar á fjallvegum, einkum vestanlands, í dag en áfram verður hiti yfir frostmarki á láglendi. Það hvessir jafnframt og frá því um hádegi og fram á kvöld verður suðvestan 15-20 m/s á fjallvegum eins og Holtavörðuheiði, Þröskuldum og Steingrímsfjarðarheiði með éljum og vaxandi hálku um leið og kólnar niður fyrir frostmark. Þetta kemur fram í tilkynningu frá Vegagerðinni.
Vegir á Suðurlandi eru að mestu leyti auðir en þó er flughált í Grafningi og hálkublettir á örfáum vegum.
Á Vesturlandi eru vegir víða greiðfærir en hálka er á Laxárdalsheiði. Hálka og hálkublettir eru á Vestfjörðum.
Á Norðurlandi er hálka og hálkublettir. Flughált er á Hólasandi og Dettifossvegi.
Hálka er víða á Austurlandi. Greiðfært er með suðausturströndinni.