Björgólfur Thor Björgólfsson hefur ákveðið að áfrýja dómi Héraðsdóms Reykjavíkur til Hæstarétts í skaðabótamáli sínu gegn Róberti Wessman og Árna Harðarsyni. Björgólfur sakaði tvímenningana um að hafa dregið að sér milljónir evra af reikningi Actavis sem forstöðumenn félagsins Salt Investments.
Frétt mbl.is: Sýknaðir af kröfu Björgólfs
Samkvæmt stefnunni taldi Björgólfur sig hafa orðið fyrir fjártjóni vegna aðgerða Róberts og Árna. Krafðist hann þess að þeir greiddu sér tvær milljónir evra í skaðabætur. Þeir Róbert og Árni voru sagðir hafa fært fjórar milljónir evra sem voru í vörslu Actavis inn á reikning félagsins Salt Investments. Féð hafi verið eign félagsins Mainsee en Björgólfur var í skiptri ábyrgð fyrir skuldum síðastnefnda félagsins. Með þessu taldi hann tvímenningana hafa gengið gegn hagsmunum félagsins.
Héraðsdómur taldi Árna hins vegar hafa verið í fullu umboði til að flytja fjármunina. Ekki hafi verið sýnt fram á saknæmi eða ólögmæta háttsemi. Þá bendi ekkert til þess að Róbert hafi komið á ákvörðuninni um millifærsluna.
Því voru Róbert og Árni sýknaðir af öllum kröfum Björgólfs sem þarf að greiða tvímenningunum 1,6 milljónir króna í málskostnað.