Um tuttugu lítrar af saltsýru láku úr keri í gámi fyrir utan fyrirtæki við Selhellu í Hafnarfirði í gær. Slökkvilið höfuðborgarsvæðisins var kallað á vettvang og tók um klukkustund að hreinsa efnið. Lekinn var bundinn við gáminn.
Til stóð að tæma gáminn en þegar starfsmenn hófust handa fundu þeir sterka lykt. Í ljós kom að sýra hafði lekið úr einu kerinu og var gámnum því lokað og slökkvilið kallað á vettvang. Í gámnum voru nokkur tonn af saltsýru.
Tvær stöðvar voru sendar á vettvang með eiturefnabúnað og gekk hreinsunarstarf vel.